Парлумон Ёддошти тафоҳумро ба тасвиб расонд

JURNAL-VAHDAT | 06.04.2012 | Душанбе, - Ёддошти тафоҳум байни Ҳукумати Ҷумҳурии Тоҷикистон ва Созмони амният ва ҳамкорӣ дар Аврупо /САҲА/ дар бораи шартҳои будубоши дафтари САҲА дар Ҷумҳурии Тоҷикистон аз ҷониби палатаи поёнии парлумони Тоҷикистон- Маҷлиси намояндагон ба тасвиб расид.

Амирхон Сафаров , муовини раиси Кумитаи Маҷлиси намояндагон доир ба муносибатҳои байналмилалӣ, иттиҳодияҳои ҷамъиятӣ ва иттилоот зимни ташреҳи санади мазкур гуфт, ки Ёддошти тафоҳум байни Ҳукумати Ҷумҳурии Тоҷикистон ва Созмони амният ва ҳамкорӣ дар Аврупо /САҲА/ дар бораи шартҳои будубоши дафтари САҲА дар Ҷумҳурии Тоҷикистон 8 июни соли 2011 зимни сафари давлатии Президенти Ҷумҳурии Тоҷикистон ба Австрия дар шаҳри Вена ба имзо расида, шартҳои будубоши дафтари САҲА-ро дар қаламрави Ҷумҳурии Тоҷикистон муайян менамояд.

Дафтари САҲА дар Ҷумҳурии Тоҷикистон тибқи қарори Шӯрои доимии САҲА ба фаъолият шурӯъ намуда, дар асоси санади хотимавии Хелсинки дорои иммунитет ва имтиёзҳои муайян аст.

Санади мазкур аз 20 модда иборат буда, бо мақсади қонеъ гардонидани будубоши дафтари САҲА дар Ҷумҳурии Тоҷикистон, иҷрои муқаррароти қарори Шӯрои доимии САҲА аз 19 июни соли 2008 ҷиҳати фароҳам овардани шароити мусоид барои фаъолияти САҲА ба имзо расида, тибқи он Ҳукумати Тоҷикистон муваззаф аст, ки шароити мусоидро барои фаъолияти дафтари САҲА дар Душанбе фароҳам оварад ва амнияти биноҳои дафтари САҲА-ро аз ҳар гуна ҳуҷум таъмин намояд.

Мавриди зикр аст, Ҷумҳурии Тоҷикистон бо ноил гаштан ба истиқлолияти давлатӣ 2 феврали соли 1992 ба узвияти САҲА пазируфта шуда, соли 1994 дафтари САҲА дар Душанбе ифтитоҳ гардид. Дар зарфи фаъолияти дафтари САҲА дар Душанбе ин ниҳоди байналмилалӣ барномаҳои зиёде дар бахши рушди ҷомеаи шаҳрвандӣ, ислоҳоти низоми судӣ, низоми интихоботӣ ва омӯзиши кормандони сохторҳои ҳифзи ҳуқуқу тартибот ба сифати кӯмак амалӣ намудааст.