Таҳлили қонунгузории миллӣ оид ба қабули ёриҳои башардӯстона

Душанбе, 22 декабр. JURNAL-VAHDAT Таҳлили мувофиқати қонунгузории миллии Ҷумҳурии Тоҷикистон оид ба қабули кӯмакҳои байналмилалии башардӯстона ва наҷотбахшон дар ҳолати рух додани ҳодисаи фавқулодда қонуни байналмилалии «Вокуниш ба офати табиӣ» (IDRL) 22-юми декабр дар Душанбе зимни баргузории мизи мудаввар баррасӣ шуд. Чорабинии мазкур бо ибтикори Федератсияи байналмилалии ҷамъияти Салиби Сурх ва Ҳилоли Аҳмар (ФБҶ СС ва ҲА) дар ҳамкорӣ бо Ҷамъияти Ҳилоли Аҳмари Тоҷикистон (ҶҲАТ) ва Барномаи рушди Созмони Милали Муттаҳид (БР СММ) баргузор гардид. Намояндагони ниҳодҳои марбутаи давлатӣ, ҶҲАТ, БР СММ ва ФБҶ СС ва ҲА қонунгузориҳои феълии Ҷумҳурии Тоҷикистон дар робита ба қабули ёриҳои башардӯстонаи байналмилалӣ, қоидаҳои байналмилалии қабули ин ёриҳо, норасоиҳои эҳтимолӣ ва қадамҳои баъдӣ дар ин самтро баррасӣ намуданд. Шамсуддин Муҳиддинов, раҳбари барномаҳои мудирияти офатҳо дар ФБҶ СС ва ҲА мегӯяд, ки ҳадаф аз барномаи IDRL – коҳиши осебпазирии мардум дар ҳолатҳои фавқулодда бо роҳи мусоидат ба омодагии ҳуқуқии кишварҳост. Тавассути ташвиқоту ироаи иттилоот, ёрии фаннӣ, баргузории пажӯҳиш ва давраҳои омӯзишӣ талош мекунем, то кишварҳо аз нигоҳи ҳуқуқӣ омодаи пазириши ёриҳо бошанд. Таҷриба нишон медиҳад, ки ҳангоми сар задани офатҳои табиӣ мутаассифона, на ҳамеша ба афроди ниёзманд ёрии байналмилалӣ лозимӣ мерасад. Масалан, монеаҳои бюрократии марбут ба раводид, сабти номи ёрирасонҳо, сабти номи гумрукӣ, андозбандӣ, иҷозадиҳӣ ба нақлиёт ва ғайра дар баъзе ҳолатҳо раванди ироаи ёриҳоро заиф мегардонанд. Ҳамчунин мушкили назорат ва ҳамоҳангии фаъолияти созмонҳои ёрирасон дар баъзе ҳолатҳо сабабгори вуруди молҳои пастсифат, такрори фаъолиятҳо ва ҳатто адами эҳтиром ба афроди ниёзманди ёрӣ мегардад.